chi siamo
Amì furlan!

Lu savevistu che a Milan al è in vore un Fogolâr che al finìs 65 agns, sichè al risulte un dai plui vieris - in Italie il secont - dai plui o mancul 200 Fogolârs sparniçâts par dut il mont?
Po ben, cumò tu lu sâs.
Ma ce fasial di biel chest nestri Fogolâr?
Prime di dut, al ten dongje i furlans che a stan o che a lavorin a Milan, cun chê di mantignî vivis la lenghe, la culture e lis tradizions dal nestri Friûl.

Par chest il Fogolâr Furlan di Milan al met in vore ogni an un programe che al cjape dentri ducj i mûts dal stâ insieme: lis Fiestis di Viarte, la Messe in Domo par furlan, il Gustâ in companie, i Zîrs par lâ a cognossi i lûcs, cul bon mangjâ e il bon bevi... Ma ancje i mûts par dâ une man al prossim: ai disastrâts di taramots e inondazions, a ducj chei che a àn dibisugne…

E infin il Fogolâr al ten cont de culture - ancje chê dai libris, si capìs, ma soredut chê vive, e dute di gjoldi - cun spetacui teatrâi, concerts di musiche di ogni sorte, massime chê popolâr e chê dai “cantautôrs”, mostris di piture e di fotografie... A son fatis propit par chel cont lis Setemanis de Culture Furlane, in novembar e intal cûr di Milan; e lis Manifestazions de Viarte, sot fiestis di Pasche. Scomençant dal an passât, cumò o podìn zontâ lis Cunvignis dal Astât tra amîs in vacance in Friûl par lâ a visitâ lûcs di interès turistic e culturâl, cun cualchi piçul spetacul ca e là di musiche e poesie, di varietât e di spas.

A proposit di culture, une vore impuartante e je la Scuele di Lenghe, Leterature e Culture Furlanis, ufierte "a gratis" ai socis che a vuelin imparâ a fevelâ ben e a scrivi just in marilenghe, cu la plene sodisfazion dai arlêfs. E nol è dut: il nestri Fogolâr al à ancje un Notiziari trimestrâl, cun articui par talian e par furlan, che tancj di lôr nus invidiin...

Ce ancje? Ben, a saressin cetantis altris robutis di podê contâ, ma par cumò nus somee che al sei avonde. E se tu âs chê di notâti, tu puedis telefonâ inte nestre Segreterie, ducj i martars dopo misdì, al numar 02/26.68.03.79. Viôt che ti coste mancul di un gustâ o di une cene in tratorie.

Mandi, amì furlan!


Testo in Italiano